The bonie lad that's far awa

Tune Donald Blue -

O how can I be blythe & glad,
Or how can I gang brisk & braw;
When the bonie lad that I lo'e best,
Is o'er the hills & far awa. -

Its no the frosty winter wind,
Its no the driving drift & snaw
But ay the tear comes in my e'e,
To think on him that's far awa.-

My father pat me frae his door,
My friends they hae disown'd me a'
But I hae ane will tak my part,
The bonie lad that's far awa.-

A pair o'gloves he gave to me,
And silken snoods he gave me twa;
And I will wear them for his sake,
The bonie lad that's far awa. -

The weary winter soon will pass,
And spring will deed the birken-shaw
And my sweet babie will be born,
And he'll come hame that's far awa.-

_________________