The Heron Ballads

1
Wham will we send to London town,
To Parliament, & a' that,
Wha maist in a' the country round,
For worth & sense may fa' that. ----
For a' that & a' that,
Thro' Galloway & a' that,
Whilk is the Laird, or belted Knight,
That best deserves to fa' that.

2
Wha sees Kirouchtree's open yett,
And wha is 't never saw that,
Or wha e'er wi' Kirouchtree met
That has a doubt of a' that
For a' that & a' that,
Here's Heron yet for a' that;
The independant Patriot,
The Honest Man & a' that. ----

3
For Tho' wit & worth, in either sex,
Saint Mary's Isle can shaw that;
Wi' Lords & Dukes let Selkirk mix,
For weel does Selkirk fa' that. ----
For a' that & a' that,
Here's Heron yet for a' that;
An independant Commoner
Maun bear the gree & a' that. ----

4
To paughty Lordlings shall we jouk,
And it against the law, that:
For even a Lord may be a gowk,
Tho sprung frae kings & a' that. --
For a' that & a' that,
Here's Heron yet for a' that;
A lord may be a lousy loun,
Wi' ribband, star & a' that. ----

5
Yon beardless boy comes o'er the hills,
Wi's uncle's gowd, & a' that:
But we'll hae ane frae 'mang oursels
A man we ken & a' that. ----
For a' that & a' that,
Here's Heron yet for a' that;
We are na to be bought the market come
Like nowt & naigs & a' that. ----

6
If we are to be knaves & fools,
And bought & sauld & a' that,
A truant callan frae the schools
It's ne'er be said did a' that.
For a' that, & a' that,
Here's Heron yet for a' that;
And Master Dicky, thou shalt get
A gird & stick to ca' that. ----